'விசாரணை' படத்தைப் பார்த்துவிட்டு 'கபாலி' படப்பிடிப்பில் தன்னுடன் நடிக்கும் தினேஷை வெகுவாக பாராட்டியிருக்கிறார் ரஜினி. ரஞ்சித் இயக்கத்தில் ரஜினி, ராதிகா ஆப்தே, தன்ஷிகா, கலையரசன், தினேஷ் உள்ளிட்ட பலர் நடிப்பில் உருவாகி வரும் படம் 'கபாலி'.
தற்போது மலேசியாவில் இப்படத்தின் படப்பிடிப்பு நடைபெற்று வருகிறது. சென்னையில் நடைபெற்ற முதற்கட்ட படப்பிடிப்பின் போது, ஒரு நாள் தினேஷை வெகுவாக பாராட்டியிருக்கிறார் ரஜினி.
இதுகுறித்து படக்குழுவில் ஒருவரிடம் பேசிய போது, "தொடர்ச்சியாக படப்பிடிப்பு நடைபெற்று வந்தது. ரஜினி, தினேஷ், கலையரசன் சம்பந்தப்பட்ட காட்சிகள் படமாக்கப்பட்டு வந்தது.
ரஜினி, ஒரு நாள் படப்பிடிப்புக்கு வந்தவர் அனைவரது முன்னிலையிலும் தினேஷை கட்டிப்பிடித்து "விசாரணை பார்த்தேன். சூப்பர்ப்.. சூப்பர்ப் ஆக்டிங். என்னா ஒரு நடிப்பு" என்று வெகுவாக பாராட்டினார் ரஜினி சார்.
தினேஷுக்கு ரஜினி சார் பாராட்டியவுடன் என்ன செய்வதென்று தெரியாமல் அப்படியே நின்றுவிட்டார். முந்தைய நாள் இரவு ரஜினி 'விசாரணை' படத்தின் பிரத்யேக காட்சியைப் பார்த்திருக்கிறார் என்று பிறகு தான் எங்களுக்குத் தெரிந்தது.
அனைவரது முன்னிலையிலும் ஒரு சக நடிகனின் நடிப்பைப் பாராட்டும் மனது எத்தனை பேருக்கு வரும். அது தான் ரஜினி சார். மேலும், அன்று முழுவதுமே 'விசாரணை' படத்தைப் பற்றியே அவ்வப்போது பேசிக் கொண்டே இருந்தார்" என்று தெரிவித்தார்.
வெனீஸ் மற்றும் மும்பை ஆகிய இரண்டு திரைப்பட விழாக்களிலும் 'விசாரணை' படத்துக்குப் பெரும் வரவேற்பு கிடைத்திருப்பது குறிப்பிடத்தக்கது.
