வெள்ளித்திரைப் படங்களைத் தொடர்ந்து, விரைவில் இணைய படங்களைத் தயாரிக்க நடிகர் கமல்ஹாசன் திட்டமிட்டு இருக்கிறார்.
திரையுலகில் புதுமையைப் புகுத்துவதில் முன்னிலையில் இருப்பவர் நடிகர் கமல்ஹாசன். அவருடைய தயாரிப்பில் தீபாவளி அன்று 'தூங்காவனம்' திரைப்படம் வெளியாக இருக்கிறது.
கமல், த்ரிஷா, பிரகாஷ்ராஜ், சம்பத், கிஷோர், மதுஷாலினி உள்ளிட்ட பலர் நடித்திருக்கும் அப்படத்தை ராஜேஷ் எம்.செல்வா இயக்கி இருக்கிறார்.
தொடர்ச்சியாக வெள்ளித்திரை படங்களைத் தயாரித்து வரும் கமல், விரைவில் இணைய படங்களைத் தயாரிக்க திட்டமிட்டு இருக்கிறார். இணைய படங்கள் என்றால் சென்சார் சான்றிதழ் வாங்க வேண்டாம் என்பது தான் இதற்கு காரணம்.
சமீபத்தில் கூட 'தூங்காவனம்' படத்தின் ட்ரெய்லர் வெளியீட்டு விழா உள்ளிட்ட பல்வேறு விழாக்களை கமலின் யூடியூப் பக்கத்தில் நேரடி ஒளிபரப்பு செய்தார்கள்.
இணைய படங்களுக்கான முயற்சியில் கமல் இறங்கியிருப்பதாகவும், விரைவில் இது குறித்து அதிகாரப்பூர்வமாக அறிவிக்க இருப்பதாகவும் கமலுக்கு நெருங்கிய வட்டாரங்கள் தெரிவிக்கின்றன.
இணைய படங்கள் குறித்து சமீபத்தில், 'தி இந்து' ஆங்கில நாளிதழுக்கு அளித்துள்ள பேட்டியிலும் உறுதிப்படுத்தி இருக்கிறார் கமல்.
