ராஜீவ் மேனன் இயக்கத்தில் ஜி.வி.பிரகாஷ் நாயகனாக நடிக்க ஒப்பந்தமாகி இருக்கிறார். இப்படத்திற்கு ஏ.ஆர். ரஹ்மான் இசையமைக்க இருக்கிறார்.
'ப்ரூஸ் லீ', 'எனக்கு இன்னொரு பேர் இருக்கு' மற்றும் 'கடவுள் இருக்கான் குமாரு' ஆகிய படங்கள் ஜி.வி.பிரகாஷ் நடிப்பில் தயாராகி வருகிறது.
இதில் 'எனக்கு இன்னொரு பேர் இருக்கு' படத்தின் படப்பிடிப்பு முடிவடைந்துவிட்டது. தற்போது ராஜேஷ் இயக்கும் 'கடவுள் இருக்கான் குமாரு' படத்தில் நாயகனாக நடித்து வருகிறார் ஜி.வி.பிரகாஷ்.
அதனைத் தொடர்ந்து இயக்குநர் பாண்டிராஜ் இயக்கவிருக்கும் படத்தில் நடிக்க பேச்சுவார்த்தை நடைபெற்று வருகிறது. அப்படத்தைத் தொடர்ந்து ராஜீவ் மேனன் இயக்கும் படத்தில் நாயகனாக நடிக்க ஒப்பந்தமாகி இருக்கிறார் ஜி.வி.பிரகாஷ்.
'மின்சார கனவு' மற்றும் 'கண்டுகொண்டேன் கண்டுகொண்டேன்' ஆகிய படங்களைத் தொடர்ந்து ராஜீவ் மேனன் இயக்கும் படம் இது என்பது குறிப்பிடத்தக்கது.
இப்படத்திற்கு இசையமைக்க இருக்கிறார் ஏ.ஆர்.ரஹ்மான். ஏ.ஆர்.ரஹ்மான் - ஜி.வி.பிரகாஷ் இருவருமே உறவினர்கள் என்றாலும் இருவரும் இணைந்து பணியாற்றுவது இதுவே முதல் முறை.
பெரும் பொருட்செலவில் உருவாகும் இப்படத்தின் இதர தொழில்நுட்ப கலைஞர்கள் மற்றும் நடிகர், நடிகைகள் தேர்வு தற்போது நடைபெற்று வருகிறது.
