அமெரிக்க ஜனாதிபதி தேர்தலில் ஜனாதிபதி வேட்பாளரை தெரிவு செய்யும் உட்கட்சி தேர்தலில் அமெரிக்காவின் அதிக பிரதிநிதிகளைக் கொண்ட மாநிலங்கள் உட்பட 6 மாநிலங்களில் இன்றைய தினம் வாக்களிப்பு நடைபெறவுள்ளது.
நவர்பர் மாதம் 8 ஆம் திகதி அமெரிக்க ஜனாதிபதி தேர்தல் நடைபெறவுள்ளது. இந்நிலையில், குடியரசுக்கட்சி சார்பில் வேட்பாளர்கள் அனைவரும் விலகியுள்ள நிலையில் போட்டியின்றி டொனால்ட் ட்ரம்ப் ஜனாதிபதி வேட்பாளராக போட்டியிடுவது உறுதியாகியுள்ளது.
இந்நிலையில் ஜனநாயக கட்சி சார்பில் ஹிலாரி கிளிண்டன் அதிக பிரதிநிதிகளின் ஆதரவைப்பெற்று முன்னிலையில் உள்ளார்.
எனினும் ஜனநாயகக் கட்சி சார்பில் ஜனாதிபதி வேட்பாளராகுவதற்கு கட்சிப் பிரதிநிதிகளின் 2,383 வாக்குகளைப் பெற்றிருக்க வேண்டும்.
ஹிலாரி கிளிண்டன் தற்போது 2,357 வாக்குகளைப் பெற்றுள்ளார். அவருக்கு இன்னும் 26 வாக்குகளே தேவை. அவருக்குப் போட்டியாகவுள்ள பேர்ணி சாண்டர்ஸ் 1,566 வாக்குகளையே பெற்றுள்ளார்.
475 பிரதிநிதிகளின் வாக்குகளைக் கொண்ட கலிபோர்னியா மாநிலம், 126 பிரதிநிதிகளைக் கொண்ட நியூ ஜேர்ஸி மாநிலம், 18 பிரதிநிதிகளை கொண்ட வடக்கு டாகோடா மாநிலம் 21 பிரதிநிதிகளை கொண்ட மொன்டனா மாநிலம்,
34 பிரதிநிதிகளை கொண்ட நியூ மெக்ஸிகோ மாநிலம் மற்றும் 20 பிரதிநிதிகளை கொண்ட தென் டாகோடா மாநிலம் உட்பட 6 மாநிலங்களுக்கான ஜனநாயகக் கட்சியின் தேர்தல் நேற்று நடைபெற்றது.
இதில் ஹிலாரி கிளிண்டன் தனக்குத் தேவையான மேலும் 26 வாக்குகளைப் பெற்றுக்கொள்வார் என எதிர்பார்க்கப்படுகிறது.
