மாத்தறை மிரிஸ்ஸ கடலில் திமிங்கிலங்களை பார்வையிடுவதற்காக படகில் சென்ற இளைஞர் குழுவொன்று வலையில் சிக்குண்டிருந்த திமிங்கிலமொன்றினை காப்பாற்றும் துணிகர செயலில் ஈடுபட்டு
இறுதியில் ஆபத்துக்கு முகம் கொடுத்த சம்பவம் நேற்று முன்தினம் இடம்பெற்றுள்ளது. இளைஞர்கள் சிலர் படகில் கடலுக்குள் சென்றிருந்த போது இவ்வாறு
திமிங்கிலமொன்று வலையில் சிக்கியிருந்ததாகவும் அவ்விடத்துக்கு வருகை தந்த மற்றைய படகுகள் ஆபத்திலிருந்த திமிங்கிலத்தை கண்டும் காணாதவாறு சென்றதாகவும் தெரிவித்த
இந்த இளைஞர்கள் தங்களோடு படகில் வந்திருந்த அனைவரும் திமிங்கிலத்தை காப்பாற்றுவதற்கு சம்மதம் தெரிவிக்கவே திமிங்கிலத்தை காப்பாற்றும் நோக்கில் அனைவரும் கடலில் பாய்ந்துள்ளனர்.
இந் நிலையில் குறித்த இளைஞர் குழுவினர் மேற்கொண்டிருந்த துணிகர முயற்சியின் விளைவாக வலையிலிருந்து திமிங்கிலம் காப்பாற்றப்பட்டுள்ளது.
இதேவேளை இத் திமிங்கிலத்தை காப்பாற்ற சென்ற வேளையில் அது குழப்பமடைந்து படகின் இயந்திரத்தை சேதமடைய செய்ததாக அவ் இளைஞர்கள் தெரிவித்தனர்.
இதனால் படகு செயலிழந்து பயணத்தை தொடர முடியாமல் போனமையினால் வேறு படகொன்று வர வழைக்கப்பட்டு அதன் உதவியுடன் மேற்படி படகு இழுத்துச் செல்லப்பட்டது.
