இந்தோனேஷிய மக்கள் வெளிநாடுகளில் முதலாளியின் வீட்டில் தங்கி பணிப்பெண்ணாக வேலை செய்வது அடுத்த வருடம் முதல் தடை செய்யப்படும் என்று அந் நாட்டு அரசு தெரிவித்துள்ளது.
ஆனால் அவர்கள் முதலாளியின் வீடுகளில் தங்காமல், தனியாக தங்கியிருந்து, முறையான வேலை நேரம், உத்தரவாதம் செய்யப்பட்ட வார விடுமுறை போன்றவை இருந்தால் வேலை செய்ய அனுமதிக்கப்படலாம் என்றும் சொல்லப்படுகிறது.
இது குறித்து இந்தோனேஷிய அதிகாரிகள், வீட்டு வேலை செய்யும் தொழிலாளர்களை பாதுகாக்கும் எண்ணத்தோடு இந்த திட்டம் அறிமுகப்படுத்தப்படவுள்ளதாகவும், இது நீண்ட நாட்களாக நிலுவையில் இருந்தது என்றும் கூறியுள்ளார்.
பணியாளாக இலட்சக்கணக்கான இந்தோனேசியர்கள் கிழக்கு ஆசியா மற்றும் மத்திய கிழக்கு பகுதிகளில் வேலை செய்து வருகின்றனர். அவர்களில் பலர் அவர்களது முதலாளிகளின் வீடுகளில் தங்கியிருந்து பணி புரிந்து வருகின்றமை குறிப்பிடத்தக்கது.
