அமெரிக்காவில் ஓரின சேர்க்கையாளர் நைட் கிளப்பில் புகுந்து 49 பேரை சுட்டுக்கொன்ற கொலையாளியும் ஓரின சேர்க்கையாளர் தான் என்ற அதிர்ச்சி தகவல் தற்போது அம்பலமாகியுள்ளது.
கொலையாளியின் முன்னாள் மனைவியும், வகுப்பு தோழனும் இதை உறுதி செய்துள்ளனர். இந்த தகவலின் மூலம், இது ஓரினச் சேர்க்கையை எதிர்த்து நடந்த கொலையில்லை என்பதும், தீவிரவாத செயல்தான் என்பதும் அம்பலமாகியுள்ளது.
ஐஎஸ்ஐஎஸ் அமைப்பு அமெரிக்காவில் தாக்குதல் நடத்தியுள்ளது உறுதியாகிவிட்ட நிலையில், அதிபர் பராக் ஒபாமா தனது பதவியை ராஜினாமா செய்ய வேண்டும் என அதிபர் பதவிக்கான வேட்பாளர் டொனால்ட் ட்ரம்ப் கேட்டுக் கொண்டுள்ளார்.
ஒர்லான்டோ நைட் கிளப்பில் தாக்குதல் நடத்திய உமர் மதீன் தந்தை சித்திக் அளித்த பேட்டியில் தனது மகனுக்கு ஓரின சேர்க்கையாளர்களை கண்டாலே பிடிக்காது,
எனவே கொலை செய்திருக்க கூடும் என்று கூறியிருந்த நிலையில், முன்னாள் மனைவியும், வகுப்பு தோழனும் கூறியுள்ள தகவல்கள் வழக்கில் திருப்பத்தை ஏற்படுத்தியுள்ளது.
2006ம் ஆண்டில், அமெரிக்காவிலுள்ள, இந்தியன் ரிவர் கம்யூனிட்டி காலேஜில் ஒன்றாக படித்தபோது தன்னுடன் ஓரினச் சேர்க்கை செய்ய மதீன் கேட்டுக் கொண்டதாக பெயர் தெரிவிக்க விரும்பாத, வகுப்பு தோழன், அமெரிக்க பத்திரிகையொன்றுக்கு பேட்டியளித்துள்ளார்.
மதீன் முன்னாள் மனைவி சிதோரா யுசுபியின் தற்போதைய காதலன், டிவி பேட்டியில் கூறுகையில், மதீன் ஒரு ஓரின சேர்க்கை விரும்பி என சிதோரா என்னிடம் அடிக்கடி கூறுவார்.
மதீனின் தந்தை, அவரை பார்த்து ஓரின சேர்க்கையாளனே.. என அவ்வப்போது கூப்பிட்டுள்ளதாகவும் சிதோரா என்னிடம் கூறியிருந்தார். இவ்வாறு அந்த நபர் தெரிவித்துள்ளார்.
மேலும் சம்பவம் நடந்த நைட் கிளப்பின் ரெகுலர் வாடிக்கையாளராக மதீன் இருந்துள்ளதும் தெரிய வந்துள்ளது. ஓரின சேர்க்கை யாளருக்கான வலைத் தளத்திலும் மதீன் தனது பெயரை பதிவு செய்து வைத்துள்ளது அம்பலமாகியுள்ளது.
அதே நேரம், ஓரின சேர்க்கையாளர்களை தேடி கொலை செய்யும் நோக்கத்திலும் மதீன் இவ்வாறு தன்னை வெளிக்காட்டிக் கொண்டிருக்கலாம் என்ற கோணத்தையும் மறுப்பதற்கில்லை என்று போலீசார் தெரிவிக்கிறார்கள்.
