மதுரையின் அலங்காநல்லூரில் நாளை நடைபெற இருக்கும் ஜல்லிக்கட்டு போட்டியை முன்னிட்டு இன்றிரவு சிறப்பு ரயில் ஒன்றை இயக்கவுள்ளதாக தெற்கு ரயில்வே அறிவித்துள்ளது.
ஜல்லிக்கட்டு நடத்த நிரந்தர தீர்வு காண வேண்டும் என்று வலியுறுத்தி தமிழகம் முழுவதும் போராட்டம் வலுத்து வருகிறது. இதனால், ஜல்லிக்கட்டு நடத்த தமிழக அரசே அவசரச்சட்டத்தை இயற்றியுள்ளது.
இதனை தமிழக பொறுப்பு ஆளுநர் வித்யாசாகர் ராவ் அவசரச்சட்டத்தை பிறப்பித்து அறிவிப்பு வெளியிட்டுள்ளார். இதனையடுத்து, மதுரையின் அலங்காநல்லூரில் நாளை ஜல்லிக்கட்டு நடைபெற உள்ளது.
இந்நிலையில், ஜல்லிக்கட்டு போட்டியை பார்வையிட வருபவர்களின் வசதிக்காக சென்னையில் இருந்து மதுரை செல்லும் சிறப்பு ரயில் ஒன்றை தெற்கு ரயில்வே அறிவித்துள்ளது.
இந்த ரயில் இன்று இரவு 11.45 மணிக்கு சென்னை எழும்பூரில் இருந்து புறப்பட்டு காலையில் மதுரை சென்றடையும்.
தாம்பரம், செங்கல்பட்டு, மேல்மருவத்தூர், திண்டிவனம், விழுப்புரம் வழியாக இந்த ரயில் இயக்கப்படும் என்று தெற்கு ரயில்வே கூறியுள்ளது.
